Foccacia med aioli og tomatsalsa

42 Flares Twitter 0 Facebook 42 Pin It Share 0 Filament.io 42 Flares ×
Print Friendly

Hemmelegheita bak eit godt foccaciabrød er tid. Masse tid. Og resultatet blir fantastisk – kvar gong! 

foccacia

Det er mange måtar å lage foccacia på, og eg har vel prøvd dei fleste. Den metoden som eg alltid kjem tilbake til og som eg likar aller best, er Morten Schakenda sin måte. Det som kjenneteikner Morten sin måte å lage brød på er TID. Lang TID. Det er kanskje det som gjer at mange tenkjer at dei ikkje kan gi seg i kast med dette, men å lage brød på denne måten er  faktisk tidsbesparande, for det meste gjer seg sjølv medan du kan gjere andre ting!

Oppskrifta eg presenterer i dag er fullt og heilt Morten Schakenda si og du finn den i boka «Om boller og brød og tilfeldigheter fra bakeriet i Lom». I tillegg finn du to oppskrifter på aioli og salsa, begge fullt og heilt mine 😉 Dei har vorte justerte gjennom åra.

Eg var i eit 40-årsselskap i går og hadde med meg foccacia med aioli og tomatsalsa.

foccacia1

FOCCACIA MED SOLTØRKA TOMAT  a`la Morten Schakenda (5 brød)

Denne foccaciaen lagar du over to dagar. Om det knip på tid kan du klare deg med 6-7 timar, men eg vil så absolutt anbefale at du gjer det slik Morten anbefaler.

Første dag:

1 1/2 kg kveitemjøl

50 g sikta rugmjøl

1 liter kaldt vatn

______________________________

Ta mjøl og vatn i ein eltebolle og bland godt i to minutt. Bruk gjerne kjøkkenmaskin. Dekk eltebollen med plastfolie og la deigen stå natta over. Dersom du har lite tid kan du la den stå i 3 timar.

Andre dag:

15 g fersk gjær

20 g salt

soltørka tomat – så mykje som du vil ha (Schakenda si oppskrift seier 175 gram, men eg synest det  blir litt for mykje) – finsnitt tomatane i tynne skiver

1 dl olivenolje

______________________________

Ta vekk plastfolien og smuldre gjæra i små bitar, legg dei på toppen av deigen. Dryss over saltet og elt deigen smidig i ca 15 minutt. Du vil sjå at deigen får ein fantastisk konsistens! Om du lurer på om gjæra verkeleg ikkje skal rørast ut i væske, så skal den altså ikkje det!

Etter å ha elta i 15 minutt, har du i soltørka tomatar og 2-3 ss kveitemjøl. Elt i ytterlegare 2 minutt til tomatane og mjølet er blanda godt inn.

Ta 1 dl olje i ein stor og god bakebolle og ha deigen over i den. Bruk hendene og vend deigen godt i oljen. Dekk med plastfolie og sett deigen til heving på ein lun stad i ca. 3 timar.

Slå den heva deigen over på benken og strekk den; ta tak i begge endar av deigen og strekk den litt. Ta ein enden og brett inn mot midten, ta andre enden og legg den over. Deigen skal no vere bretta og ligge i tre lag. Ikkje ver uroa om det ikkje ser særleg fint ut. Deigen kan vere litt laus – det er heilt i orden! Ha deigen tilbake i bakebollen, dekk med plastfolie og sett deigen til heving i 1 time. Gjenta denne strekkeprosessen to gongar til. Om du berre rekk ein gong til, så går det også fint.

Slå deigen over på bakebordet og del i fem like store emne. Legg dei over på bakebrett med bakepapir og trykk dei lett utover. Bruk olje på hendene. Det blir plass til to brød per bakebrett. Strø med litt godt salt, gjerne maldonsalt. Du kan også tilsette meir smak; du kan t.d. trykke små, halve cherrytomatar i det eine brødet, drysse rosmarin på eitt, svarte oliven i eitt og nokre kan vere naturell med berre salt. Schakenda brukar også å bake foccacia med steinsopp på toppen.

La brøda heve på benken i 45 minutt. Varm opp omnen til 250 grader.

Slå varmt vatn inn i omnen rett før du sett inn brøda. Steik brøda på 250 grader i fem minutt, skru så ned temperaturen til 180 grader og la dei steike i 35-40 minutt til. Legg brøda på ei rist til avkjøling. Pensle med god olivenolje med ein gong dei kjem ut av omnen.

Pass på at omnen kjem opp til 250 grader før du steikjer neste brett. Repeter steikjeprosessen som før.

Nyt foccaciaen akkurat slik den er, eller server med aioli, salsa og god skinke.

foccacia3

AIOLI a`la Tove (stor porsjon)

Å lage sin eigen aioli eller majonnes er utruleg enkelt, men for å lukkast må du passe på følgande:

  • alle råvarene må ha same temperatur – romtemperatur
  • det må piskast i høg hastigheit – bruk gjerne foodprosessor med visp
  • når du slår i oljen må det vere tynn stråle

aioli3

Dette treng du:

6 eggeplommer

2 ts dijonsennep

5 dl solsikkeolje

1 dl olivenolje

5-6 fedd kvitløk

1 ts salt

pepar

1 ss sitronsaft (frå fersk sitron)

Slik gjer du det:

Bruk gjerne kjøkkenmaskin med visp dersom du har, eller bruk rå handemakt – for her må det rørast!

Ha eggeplommer, sennep og kvitløk i kjøkkenmaskina. Køyr litt for å blande godt alle ingrediensane.

Slå i ca halvparten av oljen i ein så tynn stråle som du kan, medan kjøkkenmaskina går på høg hastigheit.

Ha i sitronsafta og deretter resten av oljen – framleis i ein tynn stråle.

Smak til med salt og pepar.

Aiolien er no ferdig! 

Ha aiolien i ei lufttett boks og oppbevar den i kjøleskapet. Då dette er eit produkt utan kunstig tilsettingsstoff, kan den ikkje stå så lenge i kjøleskapet. Men 3-4 dagar toler den godt!

Du må gjerne smakssette med friske urter òg!

TOMATSALSA MED GRILLA PAPRIKA OG KVITLØK a´la Tove

Dette er oppskrifta på ein basis-salsa som kan brukast til det meste. Eg serverer den til fisk, kylling, på bruschetta, til foccacia (av og til i foccacia òg!) og salsaen har sjølvsagt sin naturlege plass på tapasbordet! Oppskrifta, som er typisk for sørstatane i USA, fann eg på ein nettstad for mange år sidan. Eg meiner det er ei grunnoppskrift frå den eksentriske kokken Paula Deen som har inspirert meg til å komponere denne salsaen.

salsa

Dette treng du:

3-4 raude paprika

1 ss olivenolje (til å risle over den grilla paprikaen når den er ferdig)

2 små eller 1 1/2 bokser hermetisert tomat (gjerne av merket Mutti Polpa)

1 ss balsamico eddik

1/2 raud løk, finhakka

3 fedd kvitløk, finhakka eller raspa

4 plommetomatar

1 lite glas soltørka tomat i olje (om lag 1/2 kopp)

2 ss finkutta, fersk basilikum (eller 1 ts tørka om du ikkje får tak i fersk)

1 ts sukker

1/2 ts salt

1/4 ts grovmalt pepar

Slik gjer du det:

Del paprikaen i to og ta ut det kvite og alle frøa. Legg paprikaen på eit bakebrett  og set under grillen i ovnen i om lag 12-15 minutt. Eg brukar grillfunksjon og set omnen på 250 grader. Paprikaen er ferdig når skalet er mørkt/brent.

Legg paprikaen i ein zip-lock-pose eller på eit brett med plastfolie over. La stå i 10 minutt, ta så av alt skalet. Pass på at du får vekk mest mogleg av det som er mørkt. Skjær paprikaen i bitar og legg i ei skål. Risle over 1 ss olivenolje, set til side.

Slå dei hermetiske tomatane i ein kjele. Ha i finhakka kvitkøk, finhakka rødløk og balsamicoeddik. La blandinga småputre i 10-15 minutt.

Skjær soltørka tomat i små bitar. Del plommetomatane i to, ta ut frøa og skrap ut resten av det som er fuktig. Du skal berre bruke tomatkjøtet. Ta den grilla paprikaen og skjær den i små bitar. Ha alt dette + sukker i sausen når den har kokt i 10-15 minutt. La sausen koke vidare i ca 10 minutt. Mot slutten av koketida har du i finsnitta basilikum.

Smak til med salt og pepar.

La sausen avkjøle seg.

Smak på salsaen når den har vorte kald, kanskje du treng å tilsette litt meir salt eller pepar.

 

 

 


Om Tove

Kvardagsmenneske. Sans for det gode liv. Engasjert. Trebarnsmamma. Godt gift med draumemannen. Bur på vakraste stad på jord. Er fascinert av det skrivne ord. Glad i reiser og spanande opplevingar. Set pris på at akkurat DU les bloggen min!!!

Filed under Bakverk/gjærdeig, Egg, Smårettar, Sommarmat, tapas | Tagged , , , , , , , , , , , , , , , , , , | Kommentar

Legg igjen en kommentar

Din e-postadresse vil ikke bli publisert. Obligatoriske felt er merket med *