Grava reinsdyrkjøtt – rått og godt!

8 Flares Twitter 1 Facebook 7 Pin It Share 0 Filament.io 8 Flares ×
Print Friendly

Graving av kjøt og fisk har lange tradisjonar i Noreg. Før frysaren og kjøleskapet si tid var konserveringsmetoden nødvendig for å beskytte maten mot å råtne. Graving av kjøt er mykje enklare enn ein trur og gir ein karakteristisk og god smak til kjøtet.

Salt og sukker er hovudingrediensane når du skal grave; bruk like delar sukker og salt.  Det er også vanleg å tilsette ulike krydder og urter for å gi ekstra smak til kjøtet. Mange nyttar også ein liten akevittskvett, gjerne mot slutten av gravinga, for å sette ein ekstra spiss på smaken. 

grava reinsdyr1

I det siste har eg prøvt meg med ulike smakstilsettingar til kjøtet, og nokre er meir spesielle enn andre. Av det mest ytterleggåande eg har prøvt, er heilt klart stjerneanis. I små mengder gir dette ein heilt spesiell smak til kjøtet. Og så har du sjølvsagt smakane som er meir naturlege og som komplimenterer kjøtet fint; einebær, rosmarin, svart peppar, timian etc. Eg har også smakt grava kjøt med vaniljestang, men det var av det litt meir spesielle slaget… 

Grava reinsdyrkjøt med rosmarin og stjerneanis

I denne oppskrifta har eg delt ytrefilèten i to og grava med to ulike smakar. Legg filètane i kvar si form slik at ikkje smakane smittar over på kvarandre. Reinsdyrkjøt finn du i frysedisken i velassorterte daglegvarebutikkar, som t.d. Eurospar. Om du ikkje får tak i reinsdyrkjøt, kan du bruke hjort, elg, storfe, lam etc. 

1 ytrefilèt av reinsdyr

1 dl salt

1 dl sukker

1/4 ts malt stjerneanis (eller litt mindre om du er redd for at det skal bli for sterk anissmak)

kvistar av rosmarin

to pakkar salt à 1 kg til press på filètane

Slik gjer du det:

Del filèten i to like delar. Del blandinga av sukker og salt i to skåler. I den eine skåla blandar du inn stjerneanis. Leit fram to former til å legge filètane i. Bruk former med litt høg kant, t.d. eldfaste former. 

Dryss litt av sukker/salt-blandinga i botnen på formene der filètane skal ligge; sukker/salt/stjerneanis i den eine og sukker/salt  i den andre. 

Legg filèten i forma og dryss over resten av blandinga. Pass på at alt er dekt. På filèten som skal ha smak av rosmarin, tek du rosmarinkvistane og legg på toppen av filèten. 

Dekk til kjøtet med plastfolie, heilt ned til kjøtet. Ta dei to pakkane med salt og putt dei ei plastposar. Legg ein pakke salt over kvar filèt for å gi press til kjøtet. Dekk så til forma med plastfolie og gjerne aluminiumsfolie over der igjen. Det er viktig at det vert lufttett. 

Sett kjøtet i kjøleskap og la stå. Kor lang tid du treng til gravinga varierer litt etter kor tjukk filèten er, men tre døgn på ein ytrefilèt er meir enn nok. Om du brukar tjukkare kjøtstykke, biff t.d., må kjøtet grave i fire døgn. Hugs at tjukke kjøtstykke bør delast på langs slik at du er sikkert på ta kjøtet vert grava tvers i gjennom. 

Snu gjerne kjøtet ein gong i døgnet. 

Om du vil ha litt akevittsmak på kjøtet, kan du slå litt over og la trekke med siste døgnet. 

grava reinsdyr2

Når kjøtet er ferdiggrava vil du sjå at sukkeret og saltet har vorte til ein lake. Ta kjøtet ut av forma og klapp det tørt for væte. Nokre likar å legge det på ei rist til ekstra tørking i kjøleskapet over natta, men det er slettes ikkje nødvendig. 

Tips til servering og tilbehør

Skjær kjøtet i tynne skiver. Anrett det på eit fat og legg på litt fersk rosmarin, gjerne litt tørka einebær og nokre stjerneanis. Dette gjer også at gjestane ser kva smak som er i kjøtet. 

Grava reinsdyr3

 

Tyttebærrømme passar perfekt til det grava kjøtet. For å lage det treng du tyttebær (helst frosne, heile bær) og seterrømme. Bruk 2 dl tyttebær til eit beger rømme. Mos bæra og tilsett 1 ts sukker. Bland så den moste tyttebæra inn i rømmen. Rør inn litt tyttebær av gangen til du meiner det blir nok. La blandinga stå kaldt til du skal servere. Pynt gjerne med frosne tyttebær på toppen rett før servering. 

Flatbrød er også naturleg følge til grava kjøt. Legg nokre kjøtbitar på flatbrødet, ha litt tyttebærrømme på toppen og nyt! 

Det grava kjøtet kan også serverast med kokte, kalde poteter. Server gjerne med kald Cumberlandsaus. Sausen lagar du lett sjølv og kan tilberedast dagen i førevegen om du vil det. Oppskrifta eg har nytta er ei slags fornorska utgåve av sausen. Engelskmenn brukar gjerne tranebær i staden for ripsgele eller rognebærgelè. 

cumberlandsaus

 

Fleire gode tips når det gjeld graving av kjøt finn du på matprat.no sine sider. Klikk her for å kome til rett side.

Vintips

Om du vil servere vin til det grava kjøtet, passar Le Pousseur Syrah, Bonny Doon 2008 perfekt til kjøtet. Den pepparaktige stilen i vinen passar godt i lag med smakane i kjøtet. Den komplimenterer godt smakane i den litt søte Cumberlandsausen òg. På Vinmonopolet sine heimesider kan du lese dette om vinen: «Vinen er laget på 96 % Syrah- og 4 % Grenache- druer, og har ligget 12 måneder på store eikeliggere. Den har en rik duft av pepper, rått kjøtt, søte solbær, bjørnebær og lær. Smaken er rik, med en animalsk karakter, bløte tanniner og sødmefull frukt preget av mørke bær.»

Du finn vinen i polet sitt basisutvalt. Den kostar kr 190,-. 

Grava reinsdyr5


Om Tove

Kvardagsmenneske. Sans for det gode liv. Engasjert. Trebarnsmamma. Godt gift med draumemannen. Bur på vakraste stad på jord. Er fascinert av det skrivne ord. Glad i reiser og spanande opplevingar. Set pris på at akkurat DU les bloggen min!!!

Filed under Ukategorisert | Tagged , , , , , , , , , , , , , , , , | 1 Kommentarer

One Response to Grava reinsdyrkjøtt – rått og godt!

  1. Tilbaketråkk: Wrap med grava reinsdyrPå kjøkkenbenken | God mat skal lagast med kjærleik og rause mål

Legg igjen en kommentar

Din e-postadresse vil ikke bli publisert. Obligatoriske felt er merket med *