Tørka og krydra svineribbe

21 Flares Twitter 1 Facebook 19 Pin It Share 1 Filament.io 21 Flares ×
Print Friendly

Svineribbe som julemat har lange tradisjonar i Noreg. Svineribba kan tilberedast på tradisjonelle måtar eller ein kan eksperimentere med nye smakar og spennande måtar å preparere ribba på. 

I dag deler eg svigermor si oppskrift på tørka og krydra svineribbe. Denne ribba skal henge til tørk i 3-4 veker, så om du vil lage den til jul må du gjere det ganske raskt. Svigermor har vakse opp med denne måten å laga svineribba på. Ho trur det var ein lokal slaktar på -40 talet som byrja å gjere det på denne måten. Då eg spurte om korleis svigermor laga denne ribba, var det lettare å fortelje om framgangsmåten enn kor mykje ho brukte av kvar einskild ingrediens. Ho har det nok i «handlaget» og brukar ikkje oppskrift. Eg har likevel prøvd å lage ei krydderblanding som forhåpentlegvis er passe balansert. 

svineribbe, tørka1

 

Dette treng du:

Ei tynnribbe av svin

Malt nellik

Malt ingefær

Salt

Pepar

Tørka rosmarin

Slik gjer du det:

Skjær vekk svoren og mesteparten av feittet på tynnribba. 

Bland alt krydderet i ei skål, om lag etter desse forholda: 

  • ein pose malt nellik
  • 1/2 pose tørka og malt ingefær
  • 1 ss svart pepar

Når det gjeld salt, så tek eg om lag like mykje salt som krydderblandinga utgjer (t.d. 30 gram     krydderblanding og 30 gram salt). Rosmarinen skal dryssast over tynnribba til slutt. 

Dryss krydderblandinga på begge sider av tynnribba, gni det inn i ribba. Dryss rosmarin over til slutt. Om du vil kan du stikke små hol i ribba og stikke i nellikspiker, men dette er ikkje avgjerande for smaken.  Legg ribba i ei stor form (helst eit plastkar) og dekk laust over med  plastfolie. Dekk så alt med aluminiumsfolie og sett kaldt i 3-4 dagar. 

Etter 3-4 dagar tek du ribba ut av forma, stikk eit hol gjennom (eg stikk hol i to av hjørna), tre gjennom ein tjukk hyssing og heng til tørk i 3-4 veker. Det er viktig at ribba heng kjølig og luftig. 

Når du skal tilberede ribba må du skjære den opp i serveringsstykke og dampe dei. Dei treng litt tid, men ikkje like lenge som pinnekjøtet (kanskje to timar,  prøv deg fram). Server som tilbehør til pinnekjøt, eller som ein rett åleine. Kålrotstuing, eller rabbestappe som vi seier på Sunnmøre, er supert tilbehør i lag med kokte mandelpoteter. 

svineribbe, tørka

 


Om Tove

Kvardagsmenneske. Sans for det gode liv. Engasjert. Trebarnsmamma. Godt gift med draumemannen. Bur på vakraste stad på jord. Er fascinert av det skrivne ord. Glad i reiser og spanande opplevingar. Set pris på at akkurat DU les bloggen min!!!

Filed under Jul, Middag - kjøt | Tagged , , , , , , , , , | 2 Kommentarer

2 Responses to Tørka og krydra svineribbe

  1. Tilbaketråkk: Langtidssteikt svineribbePå kjøkkenbenken | God mat skal lagast med kjærleik og rause mål

  2. Aud Humberset sier:

    Hei Tove! Tenkte eg skulle prøve krydderblandinga til svigermora di i år. Så får vi sjå om den fell i smak. Lykke til med di førjulstid – ser no i lokalavisa at du er ei aktiv dame.

Legg igjen en kommentar

Din e-postadresse vil ikke bli publisert. Obligatoriske felt er merket med *