Kjeks med kvit sjokolade

Vi har hatt så fine dagar på Sunnmøre i det siste. I går, søndag, pakka vi sekken og sette av garde til fjells. På slike turar er det sjølvsagt viktig med god niste, litt søtt å bite i og kaldt å drikke. For å ordne med det søte, stod eg opp tidleg og baka to sortar kjeks. Den eine varianten, kjeks med kvit sjokolade, får du oppskrift på i dag. I morgon kjem ei oppskrift på kjeks med sjokolade, peanøtter og HonniKorn.

Til venstre: kjeks med kvit sjokolade, til høgre: kjeks med mørk sjokolade, peanøtter og Honni Korn

Kjeks med kvit sjokolade, ca 16 stk

100 g mjukt smør

100 g demererasukker, muscovadosukker eller anna brunt sukker

1 ss lys sirup

150 g kveitemjøl

1 ts bakepulver

100 g kvit sjokolade

Slik gjer du det:

• Rør smør og sukker til ein luftig og lett krem. Tilsett sirupen.

• Rør inn halvparten av mjølet blanda med bakepulver.

• Hakk sjokoladen grovt og bland den med resten av mjølet og elt inn i deigen. Bruk fingrane eller ein miksmaster.

• Del deigen i 16 bitar og sett kuler med god avstand på bakepaprikledd steikebrett. Ikkje trykk dei ned, men la dei få flyte ut av seg sjølv.

• Steik ved 180 grader til dei har vorte gylne i kantane, ca 12 minutt. Avkjøl på rist.

Dersom du brukar meierismør når du lagar kjeksa, så vil du få ein nydeleg karamellaktig smak. Eg kan love deg at kjeksa smakar fantastisk når ein finn ein fin rasteplass i lyngen på fjellet! Nykokt kaffi på kjele og sprakande bål er heller ikkje å forakte…

Sånn ser det ut når den gamle nisteboka må plasserast for å unngå sol og maur! Då heng vi den på ein einekvist litt over bakken! 

* n o s t a l g i *

I morgon kjem oppskrifta på dei andre kjeksa som vi hadde med oss på fjellet denne dagen!