Kunsten å steikje lammelår!

49 Flares Twitter 1 Facebook 48 Pin It Share 0 Filament.io 49 Flares ×
Print Friendly

Påskeafta steikte eg lammelår for aller fyrste gong. Eg var usikker på om eg kom til å like det og om eg kom til å klare det, men med gode råvarer tenkte eg at det måtte gå bra. I tillegg hadde eg lese meg opp både i kokebøker og på nett. Planen var med eitt ganske klar og dette måtte til for å få det perfekte måltid:

lammelårcollage

 

Det heile starta med å jakte på den viktigaste råvara: lammelåret. Eg kunne få tak i frosne lammelår i dei lokale butikkane, men var ikkje heilt nøgd med det. Difor la vi turen til Hole Kjøtt AS i Ålesund. Og takk og lov for det. For ein butikk!!! Og for ein service! Her fann eg alt eg trengte og meir til. Vi reiste mellom anna heim med eit provencemarinert lammelår som Hole Kjøtt har vunne NM-gull med.

Alle som har ein slaktar i nærleiken bør absolutt bruke fagbutikkane sine! Ta gjerne turen innom Hole Kjøtt AS i Ålesund! Du kan lese meir om dei her og her. Klikk deg gjerne innom Facebooksida deira og lik den – det gjer du her!

Eg skjønte fort at langtidssteiking av lammelåret var det absolutt beste. På nett ein stad las eg at ved laaang langtidssteiking blir kjøtet så mørt at ein nesten kan «slurpe» det i seg med sugerør. Og det skulle vise seg å stemme, gitt!

lammelår

 

Slik steikte eg lammelåret – STEG FOR STEG!

1. Eg stod opp tidleg om morgonen tok lammelåret ut av kjøleskapet for å romtemperere det. Det fekk ligge på benken i to timar. 

2. Etter to timar sette eg steikeomnen på 60-70 grader. 

3. Eg stakk eit digitalt steiketermometer inn i den tjukkaste delen av låret og så la eg låret i ei god form og sett rett inn i omnen. Det digitale termometeret vart stilt inn på 68 grader.

4. Etter 1 1/2 time hadde eg i 2-3 dl rødvin i forma, i lag med ein heil kvitløk (delt i to, men framleis med kvitløksbåtane inne i skalet), to skrella løkar, delt i rause bitar,  fire gulrøter delt i store bitar,  nokre store bitar med sellerirot og sjølvsagt 2-3 kvistar rosmarin.

5. No fekk lammelåret kose seg i omnen i mange timar. Midtvegs i steikinga tilsette eg ca 7 dl med kraft. Då brukte eg vatn som eg hadde tilsett kalvefond (du kjøper det på butikken). Eg sette lammelåret i omnen klokka halv ni om morgonen og det nådde ikkje rett kjernetemperatur (68 grader) før klokka åtte om kvelden – altså 10 1/2 time!!!

6. Då drog eg ut termometeret og skrudde omnen på 225 grader varmluft. Så fekk låret stå slik og brune seg litt medan eg silte krafta og tok vare på den. Gulrøter, sellerirot, løk og kvitløk vart kasta.

7. Medan låret låg i tørr form i varmlufta, snudde eg det nokre gongar for å få fin bruning på heile låret.

8. Etter om lag 20 minutt hadde låret fått perfekt bruning og eg tok det ut. Så pakka eg det godt inn i to lag med aluminiumsfolie og la det under eit klede for å kvile i 25 minutt. Det er svært viktig at kjøtet får kvile før du skjær i det. Medan låret kvilte på benken, sette eg inn dei fløtegratinerte potetene, grønsakene og laga sausen.

lammelår1

 

For å rekke å gjere ferdig dei fløtegratinerte potetene og dei omnsbakte grønsakene på den tida det tek å kvile lammelåret, så må ein del lagast klart på førehand. 

 

Slik laga eg dei fløtegratinerte potetene:

1. Skrell nok poteter og skjær dei i passe tjukke skiver. Kok dei lett møre i vatn, slå av vatnet, damp dei litt før du heller dei over i ei stor, eldfast form. La forma stå på benken.

2. Slå to pakkar kremfløte i ei panne, ha i salt og pepar. Skrell fire fedd kvitløk og finhakk dei. Ha kvitløken i fløten.

3. La fløten få koke opp medan du rører godt. Fløten er klart til å slå over potetene etter at den har kokt opp.

Tips: rasp ein god cheddar over potetene før du slår over den varme fløten. Ver raus! Det gir ein utruleg god smak til potetene! 

4. Når du har slått den varme fløten over potetene kan dei stå på benken heilt til du skal setje dei i omnen.

 

Slik laga eg dei omnsbakte grønsakene:

1. Skrell 4-6 gulrøter, 1-2 purreløk og ei passe stor sellerirot. Bruk gjerne andre grønsaker som du meiner måtte passe.

2. Kutt alt i rause bitar og ha i ei panne. Kok opp til dei er så vidt møre.

3. Slå grønsakene over i ei eldfast form, gjerne i lag med litt feitt/sjy av lammet. Dersom du ikkje har det, kan du bruke ein klatt meierismør.

4. No kan grønsakene stå på benken heilt til dei er klare å setje i omnen i lag med dei fløtegratinerte potetene.

 

Slik laga eg sausen:

1. Eg tok all sjya som eg hadde silt av tidlegare og slo den i ei panne.

2. Du kan anten bruke sjya som den er, eller tilsette litt Maizenna om du vil ha sausen litt tjukkare. Eg blanda ut Maizenna i eit glas med kaldevatn og slå det i den kokande sausen til eg fekk den konsistensen eg ville.

3. Medan sausen kokte justerete eg smakane og tilsette litt meir salt og litt lammefond. Det må vere god og kraftig smak!

4. Sausen er klar til servering når du er nøgde med smaken!

lammelår2

 

Rett før eg tok grønsakene og potetene ut av omnen, skar eg opp lammelåret. Eg var faktisk kjempenervøs då eg byrja å skjære i det; tenk om det var for rosa? Tenk om det var for mykje steikt? Men det var rein nytelse å skjære opp låret! Det var så mørt! Eg la kjøtet fint over på eit serveringsfat og pynta med fersk rosmarin, som så vart dekt til med aluminiumsfolie medan eg tok resten av maten ut av omnen og fekk den på bordet.

Familien hadde benka seg kring eit fint dekka påskebord og gledde seg til maten. Eg vart nesten rørt over alle dei gode tilbakemeldingane! For meg er det viktigaste av alt at ungane likar maten eg lagar, og når dei skrytte uhemma og åt i store mengder, ja då kunne eg ikkje anna enn å konkludere med at måltidet hadde vore ein suksess!

Vinanbefaling til lammelår:

  • Da Luca Primitivo Merlot 2011 (Preg av raude bær og urter. Varm ettersmak). 
  • Monte Antico 2007 (Preg av raude bær, lakris og grøne urter. Rustikk stil og fast ettersmak). 

Vi valgte Monte Antico til lammet denne gongen og var godt nøgd med den!

 


Om Tove

Kvardagsmenneske. Sans for det gode liv. Engasjert. Trebarnsmamma. Godt gift med draumemannen. Bur på vakraste stad på jord. Er fascinert av det skrivne ord. Glad i reiser og spanande opplevingar. Set pris på at akkurat DU les bloggen min!!!

Filed under Middag - kjøt | Tagged , , , , , , , , , , , , , , , , , , , , , , , , , , , | Kommentar

Legg igjen en kommentar

Din e-postadresse vil ikke bli publisert. Obligatoriske felt er merket med *