Nigellakake – søtt og syndig!

1 Flares Twitter 0 Facebook 0 Pin It Share 1 Filament.io 1 Flares ×
Print Friendly

Denne kaka heiter eigentleg ikkje «Nigellakake», men «Firedobbel sjokoladeformkake» er litt vansklegare å hugse. I alle fall for desse ungane som stadig masar og vil ha «den kaka som er så god, veit du, som du har så masse sjokolade i og som er i ei sånn der form, veit du»-kake. Då passar det betre å kalle den Nigellakake. For det er sjølvaste Nigella Lawson som deler denne oppskrifta i boka «Nigellas fest» (sjå nederst i innlegget for meir info om boka).

Du lagar røra til sjokoladekaka fyrst og medan den steikjer koker du ein sirup som du skal slå over kaka når du tek den ut av omnen. 

 

Dette treng du til kaka:

200 g kveitemjøl

1/2 ts natron

50 g bakekakao

275 g sukker

175 g mjukt, usalta smør

2 egg

1 ss vaniljeessens (eller ekstrakt, om du har)

drøyt 3/4 dl seterrømme

1 1/4 dl kokande vatn

175 g melkesjokolade i bitar

Til sjokoladesirupen treng du:

1 ts bakekakao

1 1/4 dl vatn

100 g sukker

Lag gjerne dobbel porsjon, slik at du har litt sirup til å evt pynte kakafatet med.

Slik gjer du det:

Leit fram alle ingrediensane i god tid slik at dei får romtemperatur. Set steikeomnen på 170 grader og kle ei stor brødform (2 liter) med bakepapir som dekker både botnen og kantane.

Ha alle ingrediensane, med unntak av det kokande vatnet og den hakka mjølkesjokoladen,  i ein foodprosessor (bruk kniven som høyrer til og ikkje kakevispen). La den køyre til røra er glatt, fin og mjuk. Slå så i det kokande vatnet medan du køyrer foodprosessoren i sakte fart. La alt blande seg. Løft av bollen og rør i sjokoladebitane. Ha i den bakepapirkledde forma og set den i omnen. Steik i ca 1 time.

Når det er 30 minutt att av steikjetida, lagar du sjokoladesirupen. Det er enkelt: ha alt i ein bolle og kok opp. La koke på middels varme til den får sirupskonsistens. Ikkje la den koke for lenge, for då blir den så seig at den ikkje trekk godt nok ned i kaka og berre blir liggande på toppen som eit lokk.

Når kaka er ferdigsteikt tek du den ut og set forma på ei rist. Prikk den med ein gaffel, gjerne ein tranchergaffel med lange, spisse tindar. Ver raus med prikkinga; sirupen skal nemleg trekke ned i alle desse hola! Slå sirupen over kaka når du er ferdig å prikke den. Dekk kakeforma med aluminiumsfolie og gjerne eit lite handkle. La kaka stå kaldt, gjerne natta over slik at alle smakane og konsistensane får sette seg.

Nigellakaka kan serverast på mange måtar:

  • skjære den i passe tjukke skiver og server med kruttsterk kaffi
  • Skjære den i små, kvadratiske bitar, legg ein klatt creme fraiche på toppen, pynt med bær
  • Skjær den i skiver og legg dei fint på eit fat, risle over creme fraiche eller seterrømme, strø med melis, rasp over mørk sjokolade og pynt med bær og sitronmelisse
  • Riv kakebitar til smular og ha over is. Risle over litt av sjokoladesirupen eller sjokoladesaus. Pynt med noko grønt.
Det er rart kor lekkert vi kan få det til å sjå ut med få og enkle virkemiddel. Sist eg laga denne kaka og serverte til fredagskos på jobb, var det ein kollega som meinte kaka såg så lekker ut at han lurte på om han måtte ta bilete av den! Ei enkel kake, t.d. brownie, kan brått verte til superstjerne på kakebordet om du fiffar den litt opp med friske bær, eit melisdryss, friske urter (sitronmelisse er supert som kakepynt) eller kanskje endåtil etande blomar.
Dette er ei super kake å lage om du skal ha klubb eller venninnebesøk og vil gjere unna litt av matlaginga dagen før. Den er supersaftig og har kraftig sjokoladesmak.
Boka «Nigellas fest – en hyllest til livet» har eg skrive om fleire gongar før. Eg likar så godt denne boka fordi den kjem med gode idèar til kva ein kan lage og servere til alle dei festlege anledningane vi har gjennom eit liv, men også gode rettar som eignar seg til kvardags. Boka er gitt ut på Cappelen er på heile 432 sider. Nigella Lawson formidlar oppskriftene og mathistorier som berre ho kan og det er ei fryd å lese boka.
Dette skriv forlaget om boka: «En fest for alle sanser! «Måltidene våre sier noe grunnleggende om hvem vi er og hvordan vi vil leve,» hevder Nigella Lawson. «Alle begivenheter som betyr noe for oss, markeres med mat – fra bursdagskake til bryllupsmiddag. Men dette er ikke bare en kokebok for de store anledninger i livet, det dreier seg om mat som en hyllest til livet.» For Nigella er ingen anledning for liten til å markeres med et festmåltid. Her er ideer til familiefest, til fødselsdager og religiøse høytider, eksamensfeiring og forlovelsesfest, hagefest og barneselskap. I sin engasjerte, sensuelle og personlige stil serverer hun oss et sant mylder av herlige oppskrifter fra eget og all verdens spennende kjøkkener. «
Haugenbok.no har boka til alle som ynskjer å kjøpe den. Klikk på denne lenkja for å bestille boka. Haugenbok.no er forøvrig best på service, gir raskt svar på alle dine spørsmål og leverer før du får sukk for deg! Eg er heldig og har haugenbok.no som samarbeidspartner. Samarbeidet vårt kan du lese meir om her. 

 


Om Tove

Kvardagsmenneske. Sans for det gode liv. Engasjert. Trebarnsmamma. Godt gift med draumemannen. Bur på vakraste stad på jord. Er fascinert av det skrivne ord. Glad i reiser og spanande opplevingar. Set pris på at akkurat DU les bloggen min!!!

Filed under Bakverk/gjærdeig, Bær, Dessert, haugenbok.no, Kaker, Kokebøker, Søtt og godt | Tagged , , , , , , , , , , , , , , , | 1 Kommentarer

One Response to Nigellakake – søtt og syndig!

  1. monica sier:

    Mmm,den så veldig god ut 🙂

Legg igjen en kommentar

Din e-postadresse vil ikke bli publisert. Obligatoriske felt er merket med *