Fish & Chips med Strøm Torsk

0 Flares Twitter 0 Facebook 0 Pin It Share 0 Filament.io 0 Flares ×
Print Friendly

Som matbloggar får ein jamne mellomrom invitasjonar til å vere med på diverse evenement, konkurranser og spennande hendingar. I mai i år var eg så heldig å få vere med nokre bloggkollegaer for å lage PR for Strøm Torsk. Vi fekk to oppskrifter kvar som vi skulle lage   og eg var heldig og fekk fiskekaker og fish & chips. Det beste av alt var at vi skulle vere i lag med m.a. mesterkokk Terje Ness og lage all maten på Onda restaurant på Aker Brygge. Det er vel ikkje tvil om at det var stas å få vere med på dette!  I dag publiserer eg oppskrifta mi på Fish & Chips!

Eg har budd i England og ete min del av den engelske nasjonalretten. Eg veit at kokkar legg all si ære i å få til å lage «batter» som gir sprø, saftig og smakfull innpakking av fisken. I følge win engelsk kokk er dette ein god definisjon på god batter: » I a nice light, crispy batter that gives that wonderful mouth feel of crunch as you bite into it and as long as you keep the mixture thin, the fish inside will not be overcooked and remain moist and tender. I do much prefer the baking powder batter, it is quick and I think makes a better, bit of batter than the yeast version. «

Då eg kom inn på kjøkkenet til Terje Ness var eg ikkje særleg nervøs. Eg visste kva eg skulle gjere og hadde sjølvsagt øvd heime. Største spenninga låg i om eg fann fram på kjøkkenet og om eg klarte å verte ferdig i tide. Heilt til ein ung mann stod i døra og sa på klingande Geordie-dialekt (ein dialekt frå Newcastle, England – der eg budde den tida eg var i England); «I heard someone is making Fish & Chips – it better be good!». Då kom nervane. Og spenninga. Den kjekke kokken klarte heldigvis å roe nervane og var svært hjelpsam med å hjelpe meg i å finne fram på kjøkkenet.

For å lage best mogleg batter brukte eg tips og triks eg hadde lært både i England og her heime, og så spurte eg ein eg kjenner som er kokk om han hadde nokre tips til meg. Ein ingrediens peika seg seg sjølvsagt ut heilt frå start; Newcastle Brown Ale. Å bruke vatn med kolsyre eller øl gir luft til røra (batter), som gjer fisken sprø og deilig. Ein skal heller ikkje tilsette så mange andre ingrediensar i ei slik røre. Eg valgte likevel å tilsette soltørka tomat for å sette ein liten spiss på retten. I all beskjedenheit kan eg nemne at mesterkokken Terje Ness vart sitjande å smatte på fisken for å finne ut kva den ekstra ingrediensen var. Han meinte at det var ein av dei beste «Fish & Chips»-rettane han hadde smakt! Det må vel vere tidenes kvalitetsstempel???

Fish & chips m/spennande følge (til 5 personar)

Bruk Strøm Torsk Belly Loin, ca 500-700 gram. Skjær filètane i passe store bitar. Tørk dei godt og salt bitane forsiktig (klapp det gjerne litt inn).

Vask så mange poteter som du treng og skjær dei i passe store båtar eller strimlar (med skal), klapp dei tørre og la dei ligge på eit papir til dei skal friterast.

 Batter/røre:

1 1/2 dl kveitemjøl

1 ss maizenna

1 ts bakepulver

2 dl mørkt øl

Finhakka soltørka tomat, om lag 1-2 ss.

Bland alt det tørre i ein bolle og vend inn bitane med soltørka tomat. Slå i ølet og rør godt. Røra skal henge godt på fisken når du dyppar den. Prøv deg gjerne fram med ein liten bit fyrst og reguler anten med væske eller mjøl for å få rett konsistens. Dersom du ikkje vil bruke øl kan du bytte det ut med t.d. farris eller ein kombinasjon av vatn/mjølk.

Medan røra får kvile leitar du fram ei tjukkbotna kasserolle til friteringa. Bruk om lag 1-2 liter olje, det kjem an på kor stor panne du har. Pass berre på at du aldri fyller meir enn 2/3 av panna med olje. Oljen er klar når det boblar heftig rundt skaftet på ei tresleiv (160-170 grader). Du kan bruke vanleg frityrolje eller rapsolje.

Dypp fiskestykka i røra, pass på at heile stykket vert dekt av røre. Legg stykket i den varme oljen – ikkje for mange på ein gong. Snu på fisken av og til. Fisken er ferdig når den har fått ein fin og gyllen brunfarge på alle sider. Løft den opp og legg på eit fat med tørkepapir. Steik resten av fisken ferdig.

Når fisken er ferdig lagar du chips. Vent evt til oljen har rett temperatur (sjekk med ei tresleiv) og ha potetene i oljen i små porsjonar. Ta dei opp når du ser dei har fått fin farge, legg dei over på eit tørkepapir og dryss over salt.

Server fish & chips med Heinz ketchup, avokadokrem og sweet chili-majonnes (tilbered på førehand). Sjå oppskrift under.

Avokadokrem:

2 avokado

3 ss rømme

safta frå 1/2 sitron

Smak til med salt og pepar

Pynt med friske urter

Ha avokado og rømme i ein bolle. Bruk stavmiksar og køyr til konsistensen er mjuk og fin. Tilsett sitronsaft, salt og pepar. Ha i ei fin skål og pynt med finhakka grasløk og fersk chili. Dekk med plastfolie og la stå kaldt til du skal servere.

Sweet chili-majonnes:

2 dl Hellman´s majonnes

1-2 ss sweet chili-saus (evt sweet chili dipping sauce)

finhakka grasløk, om lag ei raus spiseskei

Pynt med friske urter

Ha majonnes, chilisaus og grasløk i ein bolle og bland godt. Ha i ei fin skål og pynt med finhakka grasløk og fersk chili.

Ketchup:

Her kan du lage din eigen ketchup eller du brukar favoritt frå flaske. Sidan eg har budd i England og ete fish & chips fleire gongar enn eg kan telje, så brukar eg sjølvsagt Heinz-ketchup!

Tusen takk til den dyktige fotografen Jimmy Linus som tok bilete av all maten vår ute på bryggekanten!

«Strøm Torsk Belly Loin» er å få kjøpt i ein butikk nær deg!

Lik gjerne Facebooksida til Strøm Torsk her.

Kikk innom heimesida til Strøm Torsk her.


Om Tove

Kvardagsmenneske. Sans for det gode liv. Engasjert. Trebarnsmamma. Godt gift med draumemannen. Bur på vakraste stad på jord. Er fascinert av det skrivne ord. Glad i reiser og spanande opplevingar. Set pris på at akkurat DU les bloggen min!!!

Filed under Middag - fisk | Tagged , , , , , , , , , , , , , , , | Kommentar

Legg igjen en kommentar

Din e-postadresse vil ikke bli publisert. Obligatoriske felt er merket med *